Zo Kawtchhuah Piancham Program Hmang

ZKC tia kan koh mai thin Zo Kawtchhuah pawh kum 9 a lo ni ve reng tawh a, kum 9 chhungin harsatna chi hrang hrang a paltlang ve ngei ang le! ZKC June 12 sunday hnaih ber June 8, 2014 sunday Malaysia MCF inkhawm-ah ZKC piancham program hman a ni a, he mi ni denchhana thu inziaksiak lawmman la te lawmman sem a ni. Lawmman pakhatna “Taimakna” by Pu  J.Lalengkima, lawmman pahnihna “Hmathlir tihzauh” by Tv. Lalnunpuia, lawmman pathumna “I hun i hmang tha em?” by Pu  Josiah ten lawmman  an dawng. Literature sub committee chairman Pu Joseph Saia’n lawmman hlan na a nei. RM. 300, RM.200, RM.100 theuh hlan an ni.
   Lawmman pakhatna thuziak “Taimakna” tih chu lawmman dawngtuin chhiar chhuahna  a nei. Literature sub committee secretary Pu Edenthara Varte -an ZKC chanchin a sawi. Mipui “Aw” tih program zep tel  a ni a, mipui lam atang ZKC leh Palai chanchinbu an hmuh dan leh an ngaih dan te an sawi, tin, rawtna tha tak tak te pawh an rawn neia inkhawmten ngaihthlak man hla an ti hle. Kan chanchinbute hi chhuah chhunzawm a tan tha kan la tizel em tih zawhna chu sawiho a ni a, kan tangkaipui hle a chhuah chhunzawm zel tha kan titlang. Inkhawm mi-154 kan ni.

Johor Bahru-ah Bial fang

   Malaysia MCF EC rorel angin June 7, 2014 tlai khan Johor Bahru a Kristaa kan unaute chu han kan turin Pastor Lwan Mg leh President Pu Ngursaithuama, Pu Zoremsiama, Zaithiam Nl ZT Sangi te nen kan kal a, Johor Bahru MCF President Tangka Puia leh Pu Vulmawia ten min lo hmuak, Pu Kima inah min hruai lut nghal a, kan han inhmu chu kan hlim tlang em em mai a ni. Zanriah tuihnai tak min lo buatsaih sak a, puar el-awl a kan ei hnu chuan Johor Bahru MCF EC memberte nen zan lamah inkawmhona kan nei a, in hmaizahna leh thu zep awm miah lovin kan inkawm. Pu Ngursaithuama'n min hruai a, zawhna leh chhanna hun kan hmang a zing dar 1:45 ah kan bang thei tawk a ni.
       June 8, 2014 zing tuk ni eng mawi takah Pu Kima leh a chhungte nen chawhlui kan kil hova, inkhawm turin kan in buatsaih leh a, kan Pastor chu bial a lo zu fang deih mai a, ei leh in aiin Pathian thu a lo ngai pawimawh zawk a, tlai deuh maiah a rawn haw a, a ei kham hnuah Johor Bahru MCF biak in kan pan nghal a, chhun dar 2:00 atangin Pathian biak inkhawmna chu kan hmang tan. Inkhawm hruaitu Tangka Puia a ni a, Naupangte hun kan hmang a, Nau lawmna  hun kan hmang bawk, Sacrament kil hona leh Pastor hnen atanga Pathian thuchah ngaihthlakna kan nei leh a, Nl. ZT Sangi hnen atangin Pathian fakna hla kan ngaithla leh a, kan hlim tlang hle a ni. Johor Bahru MCF buatsaih chawhlui chu inkhawm zawng zawngte nen kan kil hova, tlai leh puarin kan awm a ni ber a ni.
     Kan lawm em em mai chu Johor Bahru MCF unaute hi inkhawm an ngaih hlutna leh an ngaihpawimawhna hi a ni a, an hruaitute chuan memberte inkhawm an kal kim loh hlauin sum sengin an in phone kual a, tan an la em em mai kan hmuh hian entawn tlak tak an ni. Johor Bahru MCF hruaitute hi Pathianah thahnem an ngai a, hma pawh an sawn hle a ni. Kan haw hun chu a lo thleng leh der mai a, an hruaitu ten bus stand thlengin min thlah a, inhmuh leh chak ngawih ngawihin kan in mangtha ta a ni. (Reported by Pu Zoremsiama)

Print this post