Malaysia MCF/ MRO

Editorial

    MMCF/MRO office chu 15/05/2014 nilaithawhtan tlai dar 6:00 khan sawn a ni a. Insawn tura kan tih hun kha a rem tak loh avangin   hun tha nghakin beng kan chhi deuh thupa, hnathawnna ram a nih angin mi tam tak ten off an la thei lo a. Thiar chhuah a rem ta tihah memberte  hnenah chawplehchilhin kan inhriattir nghal char chara bungrua kan neih ang ang kan thiar chhuak ta a ni. Hun reilote chhungin mi-32 an rawn thawk chhuak thei chu a mak a ni. Thalaite leh Nu-ho an rawn thawk tha a an fak awm hle. Pathianin Office tha tak min pek avangin Ahming ropui chu fakin awm rawh se!

   MCF tih hming chu duh hle mah ila, Pastor Timothy-an “MCF is RIP” a tita sia, tihngaihna a awm ngang tawh lo a ni. MCF a dintira lo awm ve te leh, a hlun zawk leh member tam zawk awmnate pawn MCF kan chang thei ta lo hi eng vang nge ni ta ang? Rilru a na ngawih ngawih a ni. Bungrua thiar zawhin kan Fellowship hming tur leh  18/05/2014 sunday inkhawm program turte leh tul dang ngaihtuahhovin meeting thut nghal a ni. Kan Fellowship hming atan Malaysia Mizo Christian Fellowship (MMCF) tih chu lungrual takin kan nem nghet ta a ni. Pathianin MMCF hi malsawmin kaihruai se Malaysiaa awm Zofate tan thlarau lamah leh kawng engkimah rinchhan tlak, belbul tlak a nih thin angin a nih zel theih nan member tin ten Lalpa chu auvin he MMCF hi i hlan theuh ang u.
   MMCF hi Myanmar ram kohhran tin atanga rawn kalkhawm kan nih angin Myanmar rama kohhran tlangpui/tluang pangngai inkaihhruai danin kan inkaihruai a, mimalin thuneihna a nei thei lo. Kum tirah member inkhawm kalkhawm zawng zawngten Kohhran aiawh tur EC (Excutive Committee) member turte chu uluk leh fimkhur takin an thlang a, a nominate thei bawk a ni. Mipuite thlantlin EC memberte chuan Pastor hruainain O.B an form thin. Inthlan dan dang a awm leha  mipuiin O.B direct-in an thlang thei tih a ni, mahse chu chu kan hmang khat khawp mai.
    EC memberte chuan kum tluana Kohhran/Fellowship a kal tluan theih nan ro a rel a. Kohhran tin atanga ngaihdan hrang hrang nei kal khawm rorelna a nih angin mi pakhat ngaihdan chauhin a kal ngai lo. Ngaihdan chi hrang hrang thawhkhawm atanga a tha ber chu vote lain Meeting chuan a nemnghet thin a ni. EC memberte chuan mipui au aw hi engtik lai pawhin a ngai thlaa a ngai pawimawh hle. MMCF hi a inkaihhruai dan pangngai leh a kal dan ngaiin Lalpa rinchhanin a kal  zel dawn. MMCF-ah hian hnam/chi leh kuang politics, kohhran politics, khua politics a awm lo. Chutiang hmangin member a sawm ngai lo a, thudik tak hrilh hriata an duh thlanna ngei kha kan ngai pawimawh a ni. A duh apiangten he Fellowship-ah hian zalen takin a fellowship thei a ni.
    Tuna MCF hetia a awm takna chhan chu mimal thuneihna hmanga rorelna (Dictatorship) duh leh Mipui thlan EC rorelna duh kan kal hrang a ni mai. Dictatorship kalphung chu committee memberte an nei ve ngeia mahse committee leh mipui duh danin awmzia a nei thui lo hle a ni.
    Mizo Refugee Organization (MRO) hi MMCF rawngbawlna peng lian tak pakhat a ni a, Malaysiaa awm Zofate hi chhan tam tak vangin  hetah kan lo kal khawma, mi ramah harsatna tam tak tuarin kan awm. Chutah chuan UN chungchangahte, Man theih lakahte, Damlohnaahte, Lungin tang chungchangahte leh nitina kan harsatna tawhah te hian MRO hian hma a lo la nasa thin tawh a, tunah pawh chawl lovin a la chhun zawm zel a ni. Office kan insawn avangin office phone (603-2144 2081) leh intenet hi kar lehah min rawn fit-sak ang. Kan hna pangngai kan thawk mup mupa kan duh hun hunah Office-ah kan rawn lenglut thei a ni.(Lalrinawma, Editor) (Palail Vol.07//Issue 303       18 May 2014)

Print this post