Tawng Boral Hi Engnge A Pawina?

Lalchhanhima Himtea

   Tawng a boral hian a hmangtute ngaihtuahna leh ngaihtuah dan ropui tak tak khawvel hian a chan a ni. Hringnun an hrilhfiah dan, van lam leh leilung leh a chhunga thil awm zawng zawng an hrilhfiah dan, thlarau khawvel an hrilhfiah dan…adt (ngaihtuahna leh chhutna) hlu tak chu khawvel hian a chan thin.
    Khawvel hnam tin hian hnam dang laka danglam bikna (identity) an nei theuh a, chutiang nei pha lo chu hnama chhiar tlak an ni lo. Chu danglam bikna zinga pawimawh ber pakhat chu tawng hi a ni. Tawng ber a boral chuan nunphung leh ziarang (culture) ke a bai a, ding zo lovin a tlu mai thin. Nunphung leh ziarang danglam leh mawi dangdai tak mai chu khawvelin a chan thin a ni.
    Tawng a boral chuan a hmangtute hnam zawi zawiin a bo mai thin. Tawng leh hnam hi a inzawm tlat a, mahni tawng thiam lote chuan chu an tawngin a zawm ngheh tlat an hnam rilru leh ngaihtuahna ang chu an pawh thei tak tak lo. Khua a rei deuh phei chuan an hman mi tawng neitute hnam angah inngai hlenin an awm mai thin. Chu chu hnam tukverh atanga thlir chuan bona thuk tak leh pawi tak a ni.
     A pang lehlam atanga thlir chuan t.awng a boral hian mihringte hi kan inpawh tawn tual tualin kan infin nasa tual tual a ni tih ngaihtuahna a awm ve thei thung! Inpawh tual tual leh infin tual tual chung sia tawng boral lo tura tan lak dan thiam a pawimawh hle dawn ni berin a lang.

Tawng hi mihringin a ngaihtuahna a puanchhuahna hmanrua a ni. Amaha awm a ngaihtuahna chu tawng hmanga puang chhuakin midang nen inbiak pawh nan a hmang thin a ni.

(Tv. Lalchhanhima Himtea hi Malaysia a awm lai khan Literature sub committee  secretary a ni thin a, ZKC tan US a thlen hnuah pawh thu a rawn thawh thin a ni.  A pumrua phu lo zetin aw a nei tha an ti. ZKC Vol.8, Issue 86 Nov 2012 a article tawite a ziah hi kan chhiar leh atan kan rawn thur chhuak leh a ni e.Editor)

Print this post