Ziak leh Chhiar

By: Edenthara (Varte)

Mahni pawh eng khaw kan ni emaw vei zawng zawng i han au chhuah pui leh teh ang aw. Khawvel hmasawnna hian Zofate hi min hai bik hauh lova kan nihna ang ang te hian min hrual chho nak naka, a chang phei chuan arte tui tla ang mai a in ham buai chang lah tam. Tuna hma chuan suangtuahna ramah lengin duhthu kan sam thina,kan thleng pha ve ang tih reng reng hi a ngaihna kan hre lo. Kan naupang lai han ti ve khang lang i la, thlawhna a rawn thlawk an tih tawh chuan mahni chaw ei thleng tlansanin pawnah kan tlan chhuaka kan thlir liam vawng vawng thin,mahse tunah meuh chuan Zofate khual zinna thutphah a lo ni ve ta reng mai le!!

Pu Kawlvel'an,chengkawl che sualin tuifinriat mawng a thleng a tih ang deuhin Zofate pawh khawvel hmun hrang hrangah zung kan kaih ve ta nuk mai a, a zung puak chhuak erawh tha tak ang ih maw! Hman kan sawn kan tih rual rual hian thil ho te anga lang pawimawh tak si hnufualna (hlamchhiah) kan nei tlat. Chu chu enge tih chuan mahni hnam tawng, ziak leh chhiar hi a ni. A bik takin, ram danga chengte hi i han ti deuh bik kher teh ang. Ram harsatna avangin mi ramah rethei takin hna kan thawka a chang chuan Aigupta sabel kan ngai vawng vawng thin. Mi tam zawkte hi chu thalai kum 18-35 inkar kan ni deuh thum a. Chutah ka rilru a awm ka ngaih pawimawh em em mai chu mahni hnam tawng leh culture humhalh piah lama ziak leh chhiar thiam hi a ni!!

Mahni tawng na na na chu le kan dak thei fu a, mahse a ziak leh chhiar lamah erawh kan hniam hle a ni. Tuna thang tharte hi mizo lehkha exam-na nei i la a tam zawkte hi chu kam fail ngei ngeiin ka ring, kan tawngkam hman a dik emaw dik lo emaw lam kha chu dah tha i la, mi lehkha ziah sa, Bible te hi han chhiar i la kan dang a awk emaw tih tur hian kan chhiar phak chulha mahni tawngkam chhuak ngei pawh kan ziak felfai thei lo hi chu kan hnam thangmawhbawk lian tak a ni. Ram thumna kan thlen hun phei chuan mahni pawhin kan thiam fumfe loh chuan kan fate chu an va ngaihtuahawm dawn ve aw. Tunge zirtir ta ang le? Tawngah lah kan awmna ram tawng hman a lo tam zawk dawn bawk si, khua a lo rei chuan mahni hnam nunphung culture leh zia a nung chunga phumtu kan ni mai ang tih a va hlauhawm tak em!!!

Keini Zo hnah thlakte hi mahni hriat leh thiam zawng mite hrilh paih viau si hian mahni fate leh unaute hrilh leh zirtir hi kan harsat thei khawp mai. School zir lai chu sawi loh mahni rinna 'Sakhua' fate hrilh paih keuh keuh hi kan tamin ka ring lem lo. Uangpui chang lose,a hmingin degree te kan khum ve dit diat tawh a, mahse kan naupan tet laia zan mut dawna ka nu in a hriat ang tawk leh a thiam ang tawka Pathian Thu min hrilhin tawngtai dan min zirtir thibn kha,vawin thleng hian ka thinlungah a la cham renga, kha ai a zirtirna tha ka ka hringnunah hian dawngin ka in ring tawh lo. Ka han sawi tum zawk taka chu naupan lai a in zirtir hi rilruah a nghet bika, mi ramah kan awma, nu leh pa, u leh naute rinchhan tur an awm tawh lova, mahni ke a din a lo ngai ta. Chu tah kan fate kan hman nun culture, tawng, ziak leh chhiar te hi kan zirtir loh chuan tunge zirtir ta ang? Kan zirtir thiam loh chuan engtin nge an hriat ang/engtin nge an thiam ang? An hriat loh a an thiam loh chuan hnam bo kan va ni mai awm em tih hi rilruah a lian hle a ni.

Kan mihring nihna atanga hmasawn kan tum luatah hian mahni nihna rahbi kan rah thelh a, pawn lamah var viau si hian chhung lam a hrisel lo hle a ni. Mahni rinna Sakhua, hnam tawng ziak leh chhiar a 'basic' bulthut tal chhungkua zirtir thei lo kan nih chuan kan nihnaah kan fail ta pang a ni. Chuvang chuan, khua a tlai hma hian inenfiah i la, kan nitin hun hman hi hlu taka hmangin,mahni nihnaah duhtawk mai lovin thang leh thar tur zelte tan puanven i sawi chhing sauh sauh ang u hmiang!!!

Hei article hi Friday, March 26, 201 Zo Kawtchhuah-a thuziak a ni. 

Print this post