'

Sunday 24 August 2014

MAWHPHURHNA HLEN

Kan rawn pian phat atangin tih turin min hmuak nghal a, nu pum chhung atanga kan chhuak rual rualin kan dam khaw chhuah theih nan mahni a thawk (breath) nghal a tul a, kan tal a, hnute tui a halin tapin hunte kan ngen a, he khawvelah kan din khaw chhuah theih nan hringnun kan hmang tan nghal a  ni.

Kan rawn puitling chho zel a, hna chi hrang hrang kan thawk a, chuta kan hnathawhnaah kan tih tur kan hmaa awm chu zo taka titura mawhphurhna neitu ber chu mahni hi kan ni. Restaurant a hna kan thawh chuan customer-te tha taka lo enkawl a, an duh thusam ang ngei a lungawi tak an awm theih nan a lo mikhual chu kan tih tur a ni.

Dawr kan nghak a nih pawhin boss te an rawn kal emaw kal lo emaw kan dawr nghah chu rinawm tak leh taima tak a lo enkawl chu kan mawhphurhna dik tak a ni. Mawhphurhna kan tih hi tu emaw hlauh vanga tih lam ni lovin kan tih tur a ni tih hriatna nena tha tak a thawh hi  a ni.

 
Restaurant-ah hna kan thawk a, boss-ten min hmu lo/ an awmlo tih vanga thil dang kan lo tihsan mai te, dawr kan nghak a boss-te an la rawn kal rih dawn lo tih vang a dawr danga lensan mai mai a, kan lo mutthluksan mai mai chuan kan tih tur (kan mawhphurhna) kan hlen lo mai bakah hma kan sawn har ngawt ang. Chu chu sal nun (slave) zirna hnar a ni.
 
Kan hna, kan ko a tla tawh chu kan hlen dawn lo ai chuan eng emaw chu kan chan huam a ngai a ni. Duh zawng tih rih loh te, Mut kham loh huam te, kal duhna hmun a kal rih loh te, thian kawm rih loh mai te hi kan huam a tul a ni. Kan hna hi engnge a nih tih chiang takin hriat tumin, chu hna chu mi dangin  min nawr lui vang ni lovin,  mi dangin min hmu/ min hmu lo vang pawh ni lovin kan tih tur a nih hrim hrim avangin zo takin hlen kan tum theuh chuan a va nuam dawn em. Kan Lal Isua Krista ngei pawh kha leia a rawn kal chhan ber a mawhphurhna hlenin “A kin ta” tiin a thi a  nih kha. (Palai Vol.07// Issue 314    August 24   2014)
Print this post

No comments:

Post a Comment