Chhiar la , Ziak ve rawh

Editorial
                                                                                                          
Edenthara Varte

Malaysiaah chuan BER thla te pawh han chuangkai ve thin mah ila KL atang chuan thlasik rim nam pawh kan hnim pha lo va, nitin mai hian sur leh sa karah kan tawm im a ni ber mai. Zing lamah a sa a tlai lamah a sura, a chang leh a duh duh hunah a rawn thlawr thla leh bawka, chuti reng reng chuan kum pui lingletin tlai ni kan lo chhiar liam tawh thina, kan chenna ram a nih miau avangin van lam boruak thuah tumah kan phunnawi ngai lo. Chutiang deuh bawk chuan sawi hnu leh sawi hnu ZIAK leh CHHIAR bawk hi i han ti leh teh ang. Hnampuite hnam nun intehna chikhat chu ziak leh chhiar ( Literature ) lam atang hian a ni. Lehkha chhiar tam lo chu a hriatna zima a hmuh dan leh ngaih dan hi dik ber tha berah a ngai fo thina, chu tak chu a hriat lohna a lo ni zawk.

Hnam nun humhalh kan tih fo thin te pawh hi a bul thut ber chu ziak leh chhiar tho tho hi a lo ni. Puitlin awr sen tawh hnua thu tha in hrilh lah hi lung bang suh ang hlauh a nia, kan sut keh loh chuan a sutu kan na zawk dawn tihna a ni. Mi ramah kan awma mahni thawh chhuah ei in, ha vek kan ni a, mahniah induhtawkna lian tak neiin unau thisen zawmpuite ngei  pawh hi thu tha in hrilh a har tlat. Chutak chu a bul thut a pawimawhna a ni, hnampuite hi ngaihsan loh tur ka tihna ni hauh lovin mahni nihna kalsana hnam changkangte tih dan um zun zun hi a fuh ber lem lo. I nihnaah lungawina kim nei tur chuan i nihna kha i hriatchian hmasak a ngai a, i nihna bul thut chu i thisen zungzam piah lama ziak leh chhiar hi a ni. Mizo i ni a Mizo lehkha ziak leh chhiar tui lo va kawl leh sap lam i tui tlat a nih chuan i rilru sukthlek pawh a dang ngei ang.
  
Mite angin a ziah lam kan tui lo pawh a ni mai thei mahse an ziah tawh sa tal lo chhiar tui ve hi chu kan tihmakmawh a ni. Keini chu lehkha chhiar hi zirlaite tih tur chauhah ngaihna ka nei a, hei hi kan hnam hnufualna pakhat a ni. Mi titi leh sawi chhawn vel hi kan ring kuala ngaihthlak nuam kan ti a, beng hriatna ai mit ngeia  hmuh a chhiar hi a fiah zawk tih hi kan hai fo. I chhiar tam pauh leh finna i chhar tam a nga, i ziah tam pauh leh nun tam i nei ting ang. Mimal thahnem ngaihnain Tv. Lalkohkim'n naupangte ziak leh chhiar a zirtir meka an fakawm hle, heng tuna naupang te te zirlaite hi nakina kan hnam lungphum turte an ni a, tun atanga mahni ziak leh chhiar an thiam ngat chuan an lo puitlin hunah pawh hnam dang tawnah an uire lovang tih hi ka ring tlat. Hnam dang nupui pasal nei kan tihte pawh hi han belhchian chuan mahni tawng ziak leh chhiara tui pha lote an ni duh chawk. Chuvang chuan kan hnam nun hi humhalh kan duh tak tak a nih chuan a bul thut ziak leh chhiar lam atang hian bul i tan ang u hmiang. (Palai Vol. 07// Issue 315     August 31    2014)

Print this post