'

Thursday 11 September 2014

Member-te hriat atan

MRO Card siam: August thla chhung MRO Card siam mi-13, Card renew mi-2 an awm a ni. Rawn thleng tharten MRO hi belbul tlakah ngaiin Card an rawn siam zel a. MRO pawhin tun aia nasa zawka member-te tan theihtawp chhuah zel a tum a ni.

Pastor a rawn thleng: Malaysia MCF Pastor Rev. Lwan Maung chu August 30, 2014 inrinni khan Malaysia tluang takin a rawn thleng. Amah contact duh tan Ph: 012-941 2254 a ni e.

Post Malaysia: Ram dang atanga bungrua an rawn thawn a Pos Malaysia a va lak a ngaihin he address hi i chhin chhiah dawn nia.

Pos Malaysia International Hub
Pos Malaysia Berhad
Jalan KLIA S1
64000 KLIA


Taxi a kan kalin innghahtir a tha. Haw leh lamah Taxi (or) Bus vang tak a ni. Awm lo ang tluak a ni e. Tv. Lalkulhpuia nen tum khat chu Pos Malaysia chhehvelah Taxi leh Bus zawngin/ nghakin dar kar 2/3 vel kan vak vai. Kan riak tep a ni. A tawp atawp-ah Taxi kan phar fuh hlauh mai a, kan rawn haw thei hram.

Klang kapar MCF Gospel: Klang kapar MCF te pudu ah August 31, 2014 Sunday zan khan Gospel an rawn kala, an hlim tlang hle a ni. Mimal solo 2, Zaipawl leh Rawngbawl tura chhandam tih thupui tha tak mai sawina an rawn nei bawka, an hlawk puiin , an hlim tlang hle a ni awm e.

Tuesday 9 September 2014

Sulhnu leh Nunhlui

By: Kawlngheta (Vaiphei)
Kan naupan lai hun ka ngaihtuah chang apiangin, kan kawmchhak Thingtuluang chunga U Lalhnema Thawnthu sawi thin kha ka hre chhuak ziah thin. Chung hun laia a sawi then khat ka la hriat chian deuh deuhte chu. “Puvawma leh Zawngte” te, “Lalruanga leh Keichala” te, “Pathlira leh Hrangchala” te, “Rahtea” a sawi tum phei chuan kan lo khawngaih lutuka, kan mittui hialte kha a tla thin kha a ni a. Hlauhawm lam “Thinlanga” a sawi erawh chuan kan hlau lutuka mahniin in kan hawng ngam ta lo thin a. Amah bawk chu a buai leh ta thin a. Pakhat te tein mi a thlah kual leh thin.

U Lalhnema hi keini aia kum 3 zeta upa hi a ni a. Keiniho zingah chuan changkang tak hi a ni reng a. Tun khaw hnua ka ngaihtuah let hian, U Lalhneman Thawnthu mi a hrilh thin kha belh a nei zeuh zeuhin ka hria. Mahse a hun lai kha chuan a sawi ngaihnawm thei em maia lo belh ta pawh ni se, a ngaihnawm kan ti tho tho. A thawnthu sawi ngaihthlak loh hlau khan a thu reng kan awi hlawm na sa mai.

ENTAWN TLAK NUN

   

Tum khat chu kan chhungin Bazaar turin Giant lam kan pan a, ka fapa chu nawrlira nawr pahin nu ber bag kokiah batin thuawih leh nun nem ang takin nu ber sirah chuan ka kal ve hna hna a. (Malaysia MCF pa-ho tih dan thin a ni) Giant kan thleng a  nu berin  thlaihnah zawrhna lam a pan a, kei pawh  nau awm pahin eng eng emaw en kualin Giant chhungah chuan ka tei kual ka tei kual ve a.
 
Nu ber phalna lo chuan lei ngam dawn lo mah ila ka fapa vitamin tur te chu ka lo en kual ve a. Chutia ka en kual velnaah Vitamin bur keh thei lehkha khawnga tuam chu ka thlauh keh ta hlauh mai a. A tui a rawn baw chhuak ta vek mai. Rm. 15.90 man a ni. Ka hawi kual hruk hruk a, eng nge ka tih tak ang. Ka fapa lah chu an thil zawrh te ban tumin a lo phar ve chiam a, min en ve kar bawk si.

Naupang Sunde Sikul (NSS)


Naupang Sunde Sikul (NSS): Then khatin Naupang Sunde Sikul hi NPSS tih ten an ko a/ an ziak a, mahse kan lo koh/ziah dan thin angin NSS tiin ka’n hmang zel ang a. Ka ngaih danah chuan Naupang tih hi thumal khat a nih avangin NP ti lovin N tih mai kha dikin ka hmu ve.

Chu chu ka sawi tum tak a ni lova, Naupang Sunday School hi a pawimawh tih tu pawn kan hria. Hmun hma kan neih that loh avangin NSS hi tha tak a an neih lohna a rei tawh a. Ti nawk nawk ang vel kan ni thin. August 17, 2014 Malaysia MCF sunday inkhawm ban khan NSS zirtirtute leh MCF O.B te thu khawmin sawihona neih a ni. Rei tak sawiho a nih hnuin NSS hi Pastor Quarters-ah zing dar 9 atanga dar 10:--- thleng zira zir zawh veleh kan inkhawmnaah min rawn fin se tih chu kan zaa lungrual tak a thu tlukna a ni.
  
A lawmawm tak zet mai. Mi tinten naupang kan lo ngai pawimawhzai a lang a, an mahni puala fianrial a inkhawmna hman theih hi a pawimawh hle a, Lalpan Zirtirtute chu  thlarau thianghlimin kai hruai se Naupangte chu kawng dik an kawh hmuh theih nan Lalpan awmpui rawh se.

Naupang Sunday School (NSS) ten Guitar thar lei : Malaysian MCF, NSS Sunday zing inkhawmna a hman atan guitar thar RM.500 man Sep 3, 2014 khan lei a ni. NSS zirtirtu meeting mek laiin Pu Ngursaithuama’n  RM. 100 guitar lei nan kan thawh ang e tiin aw zang tak a a rawn tinghal mai chu hruaitu nih a van tling tak em! Pathianin a let tam takin malsawm leh rawh se.

MOSSAD ( Israel Secret Service turu tak chu)

By: Ramchhanthanga        
                                                                                             
                                                  
Juda ho ram Israel hual veltu Arab ramte’na an hlauh leh tih em em, khawvelin tluk loh ena an en, an chetna apianga hnehsawh tak mai-a an hna te hlen chhuak thei zel mai Israel dotute’na an hlauh ruk em em chu Israel Secret Service MOSSAD-Central Institute for Intelligence and Special Assignments ho te hi an ni.
  
Israel ram kha ama ke-a a din phat atang khan a vela Arab ramhote nen an innghirngho nghal char char a nih kha. Chutianga thenawm ramte nena buaina nei reng an nih avang chuan Prime Minister Ben Gurion-a khan Secret Service tha tak neih kha tulin a hria. Tichuan, June 1948 khan Secret Service pawl dinna tur order chu a lo tichhuak ta a ni. A hma chuan enthla tur pawl tenau neuh neuh chu an nei ve ngei a, mahse chute taka hman tlak an ni meuh lo.

Chhiar la , Ziak ve rawh

Editorial
                                                                                                          
Edenthara Varte

Malaysiaah chuan BER thla te pawh han chuangkai ve thin mah ila KL atang chuan thlasik rim nam pawh kan hnim pha lo va, nitin mai hian sur leh sa karah kan tawm im a ni ber mai. Zing lamah a sa a tlai lamah a sura, a chang leh a duh duh hunah a rawn thlawr thla leh bawka, chuti reng reng chuan kum pui lingletin tlai ni kan lo chhiar liam tawh thina, kan chenna ram a nih miau avangin van lam boruak thuah tumah kan phunnawi ngai lo. Chutiang deuh bawk chuan sawi hnu leh sawi hnu ZIAK leh CHHIAR bawk hi i han ti leh teh ang. Hnampuite hnam nun intehna chikhat chu ziak leh chhiar ( Literature ) lam atang hian a ni. Lehkha chhiar tam lo chu a hriatna zima a hmuh dan leh ngaih dan hi dik ber tha berah a ngai fo thina, chu tak chu a hriat lohna a lo ni zawk.