ENTAWN TLAK NUN

   

Tum khat chu kan chhungin Bazaar turin Giant lam kan pan a, ka fapa chu nawrlira nawr pahin nu ber bag kokiah batin thuawih leh nun nem ang takin nu ber sirah chuan ka kal ve hna hna a. (Malaysia MCF pa-ho tih dan thin a ni) Giant kan thleng a  nu berin  thlaihnah zawrhna lam a pan a, kei pawh  nau awm pahin eng eng emaw en kualin Giant chhungah chuan ka tei kual ka tei kual ve a.
 
Nu ber phalna lo chuan lei ngam dawn lo mah ila ka fapa vitamin tur te chu ka lo en kual ve a. Chutia ka en kual velnaah Vitamin bur keh thei lehkha khawnga tuam chu ka thlauh keh ta hlauh mai a. A tui a rawn baw chhuak ta vek mai. Rm. 15.90 man a ni. Ka hawi kual hruk hruk a, eng nge ka tih tak ang. Ka fapa lah chu an thil zawrh te ban tumin a lo phar ve chiam a, min en ve kar bawk si.


Chutih lai takin lehkhabu pakhat a pafa thum golf khel en tura an kal chanchin kha ka hrechhuak ta thut mai a. An pafa thuam chuan golf khel en turin an kal a luhna gate-ah chuan luhman eng zat nge tih pa ber chuan a zawt a, kum thum a chin hnuai lam chu free a ni a, chung lam zawng chu dollar 5 a ni tiin gate vengtu chuan a chhang a. Pa ber chuan a te zawk hi kum 3 leh a chanve a ni a, a upa zawk hi kum 5 a ni, chuvangin ticket pathuam tiin dollar 15 chu a pe ta a. “Pu-a, i va hausa awm ve a, i fapa te zawk chu kum thum a la tling lo ti mah la, kan awih tho awm sia, dollar 5 i save dawn a nia” tiin gate vengtu chuan a ti a. Pa ber chuan “ a ni khawp mai, mahse amahin a hre tlat a ni. Miten hre lo mah se amah ka fapain a kum zat a hre chiang ngei a ni” a ti. A fate hmaah dawtsawi a duh thak lo tihna a ni.

Chu ve leh chuan bur keh tawh chu lei mai kha tha ka ti ta a, Nu ber rawn thleng ve bawk a  a hnenah thil awm dan ka sawi a kan la ta a. Ti chuan secruity hnenah sawi ve reng reng thain kan hre leh a.  Nu berin secruity a han ko a, a rawn thlena thil awmzia ka’n sawi takah chuan a pawi lo ve a ti a. Lawm takin kan dah leh ta a ni. Rm.15.90 kan hloh thelh a, kan hmu leh ang a ni. Chu aia pawimawh zawk chu mi zawng zawng tan entawn tlak nun theh chhuak thei lo mah ila kan fate leh kan chhehvel tanah tal hi chuan kan tum ve dawn lom ni tih hi a ni. (Zo Kawtchhuah  Vol. 10// Issue 108     September 2014)

Print this post