Lal Isua Din Kohhran

    Kohhran tih hi Greek tawngin Kuriakos (Lalpa ta) tih leh Ekklesia (koh chhuah) tih a in a. Hebrai tawng, “Qahal” tih chu Israel pung khawm sawina a ni. Pathianin a ko khawm a, an hnenah a duh zawng thu a sawi a, a hruai bawk . Thuthlung Thar kohhran chu khawvel mi nihna atanga Krista mi ni tura koh chhuah an ni a. Kristaa tihhran, mi thiang hlim ni tura kohte, Lal Isua din, Ama ta, Ama tana a din, Thlarau Thianghlima chenchilh leh enkawl a ni. Lal Isua ngeiin, “Ka kohhranho ka rem chho vang,” (Mat.16:18) a ti a. Hetah hian Ka kohhranho ka din ang” a tih hi chhinchhiah ila, kan hriat reng tur chu kohhran dintu leh a neitu chu Lal Isua hi a ni tih hi. Chu vangin, kohhranah hian thuneitu ber leh lal ber tur chu Lal Isua hi a ni. Kohhranah hian Isua Krista ni lo tu emaw, thil dang emaw a lal chuan Lal Isua din kohhran a tling lo tihna a ni.

    Kohhran invuah apiang hi Lal Isua din a ni vek kher ang em? A nih loh leh Lal Isua din ni lo kohhran a awm thei ang em? tiin zawhna siam ila, kan chhan dan a inang lo fur awm e. Tun lai kan zinga kohhran ding thar zelte kalhmang leh rawngbawl dan en hian Lal Isua din ni lo kohhran kan awm thei mai lo’ng maw tih hi chhut ngun a tul ta hle. A chhan chu tun lai kohhran ding thar zelah hian Lal Isua ni lo, a din tu (founder) dang an awm zel hi a ni. An kal zel han en pawh hian chung kohhranah chuan Lal Isua aiin founder-te hi an lal hle zel a, pawl hminga ham thatna emaw, malsawmna lo awm pawh hi pu-te ta a ni deuh vek a. Tun hma kum 5 kal taah khan rawngbawlpui thian pakhat thusawi hi ka hre chhuak fo thin a, hetiang hian a sawi a. “Kan kohhran hian pathian pahnih kan nei a, hmuh theih pathian leh hmuh theih loh Pathian, hmuh theih loh Pathian hi chu khawngaihna, lainatna leh diknain a khat a, a duh loh zawnga kan nun chang pawhin a hnena ngaihdam kan dil chuan min ngaidamin kan phu loh malsawmnain min vur thin. amaherawhchu, hmuh  theih kan pathian erawh chu, a hlauhawm hle a, a lung kan tiawi lovang tih hlau reng rengin ka ip reng a. A chhan chu a lung kan tihawi loh chuan kan nihna leh awm hmun te thleng hian tihdanglam a ching a kan hmalam kaisan ve theihna tur pawh hi a thuneihna hian a huap vek a, tuarhlelhawm tak a ni,” tiin. Hetiang kohhranah hi chuan Lal Isuan thuneihna a chang pha ve lo va, founder thu thu kha a ni ber a, Lal Isua din ni lo kohhran kan tih pawh hetiang kohhran hi a nih hmel. A sawi chhun zawm zel a, “ Kan kohhranah chuan pu-te hian an member te hi, hmanrua (raw material)-ah min hmang a, chumi hmang chuan thil (sum, hlawkna) an siam chhuak ani ber a ni,” a ti a. A sawi dik hle awm e. Khawmpui rorel te pawh han nei ve thin mah se, palaite rorelin awmzia a nei hran lo.
    Lal Isua din kohhranah chuan a dintu vei ber, “Bo-te zawnga chhandam” hi an ngai pawimawh ber a, hna tul berah an neih a ni. Kan sawi mek kohhranah hi chuan bote zawnga Chanchin Tha hril an vei pha meuh lo. Chu ai chuan ram eng tawhah mi tu emaw (chhungkhat vuangva zawngin emaw, mahni chipui zawngin emaw) kohhran a awm thalaite hi eng emaw tawktarh hmangin an thlem chhuak ngei thin. Daw lar lar lar chungin Dollar an zawng a, chumi hmang chuan kohhran awm saho hi an tibuai a, hetiang buaina tuar nasa ber chu keiniho hi kan ni awm e.
    Chuvangin, kan awmna kohhran hi Lal Isua din, A duh zawng kawng zawha, a vei ber, “Bote zawnga chhandamna Chanchin Tha hril” hi an vei ber a ni em? Kohhranho rorelna leh kalhmangah hian Lal Isua hian thuneihna a chang nge? tihte hi ngiahtuah a hun ta hle mai.

(CALVARY CHURCH, Silver Jubilee (1986-2011) Hriatrengna Article leh Sermon-te, Published by Calvary Church, Tahan-Kalaymyo)

Print this post