Zofate leh eizawnna

 By: Josia Z. Khiangte

Khawvel hring nunah hian mi tinte hian pawimawh tih zawng kan nei theuh a, mahse; kan pawimawh tih zawng pakhat leh pakhat a inang lo nuk a, pawimawh kan tihdan pawh a inchen lo hlawm ngei ang.  Amaherawhchu eizawnna hi mitin ten pawimawh ber pakhatnaah dah vek kher lo mah ila, a pawimawh berte zingah chuan kan dah ve ngei ang tih chu kan pawm tlangin a rinawm.
Eizawnna kan tih hian a kawh tum ber ni a lang chu, ei kan hmuh theih nana kan hnathawh, kan rinpui ber hi a ni a, a chhan chu ei hmu tur chuan hnathawh a ngaih tlat vang a ni.

Ngaihtuah tur pawimawh tak chu keini zofate hian engtin nge tun lai khawvel changkang tawh takah hian ei kan zawn ve theih ang, tih hi a ni. Eizawnna tha kan neih theih nan thil tul tam tak a awm ngei ang. Amaherawh chu, a tul leh pawimawh nazawng kan sawi seng vek dawn lo a, tul zual bikte chauh tarlan kan tum dawn a ni. Chung thil pawimawh tak maite chu:

1. Hnathawh
2 .Taih mak
3. Tui zawng leh thiam bik neih te hi a ni.

Hna thawh

Ei hmu tur chuan hnathawh a ngai a. Hnathawh hi mi zawng zawng tih tur, Pathian-in mawhphurhna min pek a ni. Christian ten kan rinpui ber Bible in “Thawk lo chuan ei pawh ei suh se,” (II Thesolonica 3:10) a ti hlawl mai. Chuvangin hnathawh hi thupek pakhat ang a ngaih theih pawh niin a lang. Mi tam takin taima taka hna an thawh fan fan laiin, thawk peih hauh lo, hnathawh hi a hlauhawm ta emaw tih ang mai a ngaite pawh an awm ni hian a lang a. Engpawhnise, ei hmu tur chuan peih pawhin, peih loh pawhin hnathawh a ngai hrim hrim a ni. Peih chang chauha hna thawk thinte nunah hian hlawhtlinna tak tak hmuh tur a tlem khawp mai. Chuvangin keini zofate hian hna thawh hi kan hlau tur a ni lo va, thawh tur kan hmu hi lawm em em zawk tur kan ni.

Taihmak

Hnathawh hi taihmakna chikhat a ni teh meuh mai a, mahse hna thawk nazawng hi mi taima an ni vek  kher lo. A chhan chu hna thawk ve tho si, rilru pe mang lova thoh, zawmthaw taka hnathawh hi a awm ve thei tlat a ni. Eizawnna tha leh mumal tak neih duh chuan taih mak a ngai a. Khawvela mi hlawhtling leh ropui tak takte hi mi taima an ni deuh zel. Mi, a taihmak avang a hausa takah inchher chhuak an awm ang bawkin taima ve tho si mahse, sum lamah sang thur thur lem lote pawh an awm ve tho mai. He tiang hian sawi fiah ta ila. Taihmakna hian mihausaah min siam vek kher lo, mahse;  mitaimate chuan ei an hmu deuh zawk zel chu a lo ni.

Tui zawng leh thiam bik nei

Tui zawng hriat hi a pawimawh hle a, chutiang bawkin thiam bik neih pawh hi a ni. He thil pahnih hi kal dun, tang kawp tlat anga ngaih theih a ni a.  A chhan chu miin mahni tui zawng a hmuh chhuah a, chumi kawng takah hna a thlan fuh chat chuan thiamna a chhar chhuak thuai a, a hnathawh a thiam belin nuam a ti a, a hlim a, hma a sawn chak avangin promotion a dawng a , a nihna a kaisang thei thuai thin. Chuvangin eizawnna tha I neih theih nan i tui zawng tak hnaah lut chat mai la, chu chuan a tithang lian chak dawn che a ni.

Keini ram thumna kal tumte tana pawimawh tak chu Malaysia hi kan awmna kumhlun tur ram a ni lo va, kan tum ber zawk chu ram thumna a ni. Chuvangin he laia kan awm chhung hian nakina kan la kalna tur ram nen a inmil tur hna thlan thiam a tha khawp ang. Kan chhawm theih zel tur hna kan thawh a, kan lo inlak khawl phawt chuan ram thumna kan thlen hunah pawh hna hmu lo leh baihvai kan awm lo ngei ang le.

Eng hna berah nge lut ila tha ang?

Eng hna berah nge lut ila tha ang tih hi sawi thiam a har a, mi pakhat tan a hna tha hi mi dang tan a lo tha lem  lo va, tin; mi dang tan tha lo kan tih pawh  then khat tan hna tha tak a lo ni ve lawi si a ni. Chutiang a nih avangin mahni nen inmil tur hna zawn thiam a pawimawh hle ang. A tawi zawng chuan I tana tha ber tur hna chu i tui zawng tak, I thiam zawng takah burin lut chat mai la, chu chu I tan a tha ber, I ti sual lo ber bawk ang. Chutih rualin mi tam tak mahni tui zawng hre chhuak thei hauh lo, mahse; hna pakhatah an han luhin emaw, hna dang dang an thawh chhinah emaw tui chho ta viau si an awm thei a, chutiang a mahni tui zawng hmuchhuak chawp a hlawhtling ta viau si pawh sawi tur an awm ve nuk tho mai. Hemi kawng chihnih zing a pakhat khatah hian kan tel ve ngei a nga,  khawi nge tha zawk tih a awm chuang lo va, kan hman thiam zawk zawk kha kan tan a tha zawk tur chu a ni mai dawn a ni.

Eng hnate nge awm ang?

Hna hi chi hrang tam tak a awm a, a tlangpuiin tihian then dawn ta ila. Production sector an tih mai thil siam chhuah, entirnan agriculture nen inkungkaih buh leh bal chin, thlai chin etc. tin; manufacturing sector an tih thil siam chhuah ve tho mahse, factory nen inkungkaih, entir nan puan than siam chhuahte, pheikhawt siam chhuah te, TV siam chhuahte etc. A dang leh chu service sector an tih, kan thiam thil mite hnen a hlan chhawng leh theih  chi entir nan doctor hna, zirtir hna etc. te, leh mahni a sumdawnna ang chi thil man tlawm deuh hleka khar a hmun dangah zawrh chhawn leh ang chite, sawi tur tam tak a awm thei ang. Hetiang hian hna chi hrang hrang awm mahsela heng hlawm lian tak tak chi liah hian an khung khawm theih deuh vek a, heng zingah hian I duh zawng tak I thlang chat mai dawn a nia.

Hna neitu Boss-te mi duh zawng    

Hna neitu boss te hian eng ang mi nge an duh ang? Hna neitu boss te hian mi tha, taima leh mi thiamte hi an duh tlangpui a. Khawi hmunah pawh mi tha hmuh hi a awl lo va, mahse mi tha mahni tluan tluana tluang ve tawp mai, thiam nei chuang lo hi a awm ve theih tho a, chung mite chu kawng hrang hrangah hman tangkaina awm thei ve bawk mahse, a chhawrtu puten hman tangkai tak takna tur an nei tlem thei thin hle. Chutiang bawkin mi taima, mi thiam, mahse, rilru tha lo a awm ve leh theih tho a, heng mite pawh hi an pute lakah an tla tlum thei tak tak chuang lo va, hna atangin an ban thuai thin. Chuvangin heng kawng chi thum mi tha, taima leh mi thiam nih kawng a tlingte hi an hmuh chuan hna neitu puten an duh em em thin a, an hnen a  thawk reng atan an duh thin a ni.

Zofate Hnathawh
 

Keini zofate hi khawvel tehna a tanga thlir chuan kan eizawnna hi a la hniam hle a, mi in hna changkang tak tak an thawh laiin keini chu hna hniam te teah kan la lungawi viau zel ni hian a la hriat a. A chhan chu kan khawhmuh a zim vang te, kan in zirtir tam tawk loh vang te, kan tum loh vangte leh kan lungawina tawk a hniam hrim hrim vangte pawh a ni thei.

Engpawh nise, vantlang ngaih a hna tha leh hna changkang hi chu a awm teh meuh mai, chung hna chu mipui, mimir hian hna zahawmah kan ngai a, thawk thei ila te pawh kan tih chang a  awm ve thin ngei ang. Amaherawh chu, khawvelah lungawina kim a awm tak tak chuang lo va, kan hna hi vantlang ngaihin a sang emaw, sang lo emaw pawh nise kan mamawh tawk sum kan lak luh a, hlim leh lawm taka kan thawh theih leh nuam ti taka kan thawh theih hna hi mitin te hian hna thaah kan ngai ve mai tur ni hian a lang.

 Sawiho tur zawhnate:
 

1. Ram chang kanga mite hi ram hnuai hnung zawk a mite ai an taima zawk?
2. Mi thatchhia an awm tak tak em? Nge hlawh a that tawk loh vanga hnathawk peih lova thatchhia kan ti mai zawk?
3. Mizote hi hnathawh kawngah in fuih kan la ngai em?
4. Zofate hi kan hmasawnna a la tlem em em a, hei hi mi ngo ho ai kan thluak a hniam zawk vang a ni thei a ngem?

Print this post