By: James Chhana
Australia
1990 kum atang khawvel huapa internet connection lo tan tawh mahse, United Nations (UN) hnuaiah hian 2005 khan Internet Governance Forum (IGF) tih department pakhat an dih ve chauh a ni.Mihringte tan thil zangkhai leh hman awlsam tak a nih avangin hmangtu pawh an tam chak hle. June 30, 2009 record-na atang internet pawt (register) zat maktaduai 1670 (1.67 billion) an awm. April 2010 survey-na atang Top Level Domain (TLD) an tih .com, .org, .net..etc, register awm zat 758,081,484. Sum zawn nan leh bungraw tlangzarh nan leh hralh nante an hmang deuh ber. A bikin social network service (facebook, myspace, tagged,...etc) tlawh leh hman a hlawh hle. Mahni khingpui tur awm ang inzawntir nante, hmelhriat ngai loh inhmelhriattirna atante leh chi hrang hrang a tam mai. Tun laia an uar leh lar deuh ber chu facebook hi a ni awm e. June 2010 thleng hian facebook hmang (active user) maktaduai 400 chuang an awm. 2004 khan private-a hmuhchhuah a ni a, 2008 revenue US Dollar maktaduai 300 ($300 million) chuang a ni.
Internet khawvela en hlawh leh lei hlawh ber chu sex lam (pornography) thil hi a ni tlat mai. 2006 revenue US Dollar maktaduai 97, 060 ($97.06 billions) a tling nia. Second tin hian sex lama cheng hman ral zat US Dollar 307, 364. Second tin hian sex lam thlirtu 28,258 an awm. Nitin email-a sex lam in thawn zat maktaduai 2500(2.5 billion) a chuang (chu chu email thawn zawng zawng 8% a ni). USA atang ringawtin minute 49 danah sex video film khat tal an siam chhuak thin. Internet hi engkim phochhuahna a ni ti ila a sual tamin ka ring lo. Mihring phei hi chu kan engkim mai, Adama sut, sut hnih sut thumna thlengin an phochhuak awm e. Pathian thu leh hla, khawvel thu leh hla chhiar seh loh leh en sen loh a awm bawk. Kan zawn thiam dan azirin Lal Isua pawh kan zawng hmu thei hial ang. Thalaite tual chaina pakhat a ni a tih theih bawk awm e. Suam hmangte, bum hmangte pawh an awm. Internet crime te cyberterorism te a lo chhuak a. FBI pawn a tulpui hle. Inven fimkhur dan tur a tlangzarha, report pe tur pawn a ngen a ni. Malaysia rama internet cafe (dawr) hi han en ila thalai an tam hle. Engnge an tih ber le? Mi 80% te hi chu Game khelh leh social network service hmanga thiante nen lehkha in thawn kual ilo nan hun an hmang deuh ber.
Khawvel tih takah thil a kimchang hle. Social Network Service leh chat room-te hmangin nula tlangval tam tak an inngaizawnga inneihna hial te pawh a lo awm. 2004-2006 inkarah Website then khat survey-na atangin internet atanga inchhar chawpa innei ta hi sing chuang an awm. Keini Zofate zingah pawh sawi tur an awm tlat nia. Rahbi thar dang dai tak a ni. Tun thleng hian mi engzat takin internet hmangin "tiam tlat e" tih tum awm ang maw! mi engzat tak innei tawh awm ang maw! Keini Zofate pawn internet kan chim hle tawh. Website puitling leh a tenau zawk (a thlawna siam theihna ang chi) neite kan in chhiar seng tawh meuh lo mai thei. Kan site entu an tam theih nan kan thiam dan tawk leh theih ang tawkin kan buaipui theuh awm e. Chu lo dangah chuan group mail hi kan hmang nasa hle awm e. A bikin google leh yahoo group mail hi hman tlang lawn ber pawl a ni.
Keini zofaten he khawvelin rahbi thara hmanraw thar a rawn chhawp chhuah internet hi engtiangin nge hman tangkai chhoh ve zel kan tum le? Kan hnam nun dan leh tlawmngaihna, kan history zawng zawngte , lehkha bu tha kan neih chhun zawng zawngte internet-ah hian khawi laiah nge en tur awm le? J.F. Laldailova dictionary te kha khawi website-ah nge keu tur awm ang? Aw..thil dang chi hrang hrang pawh sawi tur a awm ngei ang. Kan Mizo tawngte hi internet tawngahte hian tel ve thei turin hma la tawh an awm em? Kan site-ah te hian Mizote tan engnge tangkai pui tur pho chhuah thin kan neih aw ka ti thin. Heng zawng zawng active taka tithei tur chuan a bik takin thalaite kan pawimawh hle ang. Kan thiamnate kan theihnate hmangin mi tihdan tha zawk enin inkawhhmuh dan kawng tha kan zawn hmuha kan inzirtir a tul hle. He khawvel rahbi thar rawn inchhawp chhovah hian keini Zofate pawn rah dan leh ke pen chhoh zel dan kan thiam theih nan leh rahbi thar kan inchhawp chhoh ve zel theih nan thalaiten tan i la ang u hming.
"He thu hi (6/28/10) Zo kawtchhuah piancham thu inziaksiak lawmman pakhatna dawngtu thuziak a ni e. Kan lawmpui tak meuh a ni".
Print this post
No comments:
Post a Comment